As empresas TIC galegas xuntan forzas para incrementar a seguridade dos mariñeiros
venres, 25 de xaneiro do 2019
Entre
os proxectos de tecnoloxía marítima máis importantes que están a
coller pulo en Galicia atópase sen
dúbida o proxecto MAR-1, impulsado por unha alianza de empresas
locais para mellorar, con innovación, a seguridade dos barcos
pesqueiros na nosa costa, unha contorna litoral onde se concentra
o 15% da produción pesqueira de toda a Unión Europea. O proxecto
MAR-1 diríxese tamén a optimizar as condicións de traballo do
sector: un tecido produtivo que dá traballo directo a 33.000 persoas
e sustento indirecto a 120.000 familias. Entre as empresas
participantes atópase Imatia, que pon o foco nas posibilidades das
tecnoloxías actuais para loitar contra o principal problema que
sofren os nosos profesionais do mar: a falta de seguridade.
Segundo
informa a empresa galega, “debido ás complicadas condicións
marítimas e á dificultade da súa previsión, o número de
accidentes é moi elevado neste sector e, por desgraza, comporta a
perda de vidas humanas máis a miúdo do que nos gustaría”. Ao fío
disto, a firma lembra que só en 2017, o servizo de Salvamento e
Socorrismo de España atendeu a 99 persoas ao día e en Galicia
atendéronse un total de 878 persoas (Informe Salvamento Marítimo
2017). Á elevada cifra de incidencias que resolver únense unha
serie de condicionantes que historicamente limitan o traballo dos
profesionais: cousas como a imposibilidade de acadar a localización
exacta de determinados sinistros no mar ou a falta de recursos
tecnolóxicos (até o de agora) que permitan a coordinación máis
efectiva de recursos humanos e materiais.
Sobre
as devanditas eivas xorde o proxecto MAR-1, que inclúe, entre outras
cousas un vehículo de superficie non tripulado e desenvolvido por
Industrias Ferri, contando con sistemas de salvamento e supervivencia
equipados.
A
iniciativa ten o seu xermolo en 2015, cando xuntaron forzas Imatia,
Industrias Ferri, Cartogalicia, Arteixo Telecom ou Scio Soft cun
obxectivo común: tirar proveito das posibilidades que se abren cos
recursos intelixentes de información e comunicación para mellorar
as condicións de traballo no mar.
Segundo
explican, MAR-1 consiste no desenvolvemento dunha plataforma
intelixente que coordine a seguridade marítima da frota pesqueira e
que permita mellorar a toma de decisións e reducir os tempos de
resposta en casos de emerxencia. Esta plataforma integra e coordina
toda a información recibida polos distintos sistemas creados, como
sensores a bordo, tecnoloxías carrexábeis (wearables)
ou imaxes transmitidas en tempo real por vehículos autónomos (tanto
marítimos como aéreos).
Os
obxectivos que se perseguen con este sistema son: facer seguimento da
frota pesqueira (permitindo en caso de emerxencia coñecer en tempo
real a situación, localización e a tripulación a bordo desta),
posuír unha plataforma que integre toda a información (xerando
alertas de forma automática e apoiando a toma de decisión) e
dispoñer dunha frota de drons que permitan avaliar e prestar apoio
ante o aviso de calquera incidente.
O
proxecto, que forma parte da CIVIL UAV Initiative da Xunta de
Galicia, permitirá “unha xestión de emerxencias marítimas moi
distinta á actual”, sinala Imatia, engadindo que a partir de 2021
prevese que o proxecto estea funcionando nas costas galegas.