As Tartarugas Mutantes pelexarán en Injustice 2

A franquía de xogos de Injustice, obra dos creadores de Mortal Kombat, conseguiu callar coa súa versión escura dos heroes de DC Comics, conseguindo incluso que o universo paralelo no que se ambienta teña unha das series regulares de banda deseñada de máis éxito para o editor norteamericano, polo que o lanzamento de Injustice 2 para Xbox One e PlayStation 4 era inevitable, faltando até o momento a súa versión para PC, que finalmente verá a luz mañá, nunha Ultimate Edition que permitirá acceder a 9 loitadores novos cando estea dispoñibles, 2 sombreados de equipo exclusivos para empregar con varios personaxes e 3 skins exclusivas que engaden aspectos e diálogos novos a personaxes concretos.
O xogo dende o seu lanzamento foi recibindo lotes de novos loitadores, e xusto esta fin de semana desveláronse os últimos que completarán o cadro de personaxes, creando grande expectación, xa que a Red Hood (Carapucha Vermella), Starfire, Sub-Zero, Manta Negra, Raiden e Hellboy uniranse The Atom, a Encantadora e as Tartarugas Mutantes, sendo estes últimos unha grandísima sorpresa, xa que levaban moitos anos afastados dos xogos de loita que non fosen brawlers.
Este último lote de loitadores probablemente sexa todo un éxito de vendas, pero o que parece claro é que será un grande reclamo para os que non mercasen aínda Injustice 2, que así porán o ollo á súa versión completa, tanto para PC como para consolas de videoxogos.