As PEME terán ao seu alcance un novo programa de internacionalización dixital
venres, 20 de decembro do 2019
O
conselleiro de Economía, Francisco Conde, avanzou este xoves 19, na
entrega da terceira edición do premio Galicia Global, que
o Goberno galego vai engadir un novo e importante recurso aos plans e
iniciativas para favorecer a presenza no mundo das nosas empresas.
Trátase, dixo, “dun novo programa para impulsar a
internacionalización dixital das PEME”, inserido na estratexia
Galicia Exporta, que na súa vindeira edición tamén será obxectivo
dun fortalecemento análogo (un 40% máis de investimento que na
anterior convocatoria). O obxectivo do programa dixital non se vai
limitar a favorecer o acceso aos mercados mundiais, senón tamén a
promover a diversificación dos destinos de vendas.
Polo
que respecta a Galicia Exporta, é como dixemos un plan para impulsar
e favorecer a presenza no mundo das nosas empresas (os plans que
xestionan 35 agrupacións empresariais da nosa terra). Vén da man do
IGAPE (Consellería de Economía) e mobiliza centos de empresas (a
previsión este pasado verán era mobilizar unhas 480 firmas da nosa
terra) en actividades a realizar en ducias de países (arredor de
tres ducias deles na convocatoria vixente). As Tecnoloxías da
Información e a Comunicación, xunto co audiovisual, o naval,
alimentación, o téxtil e o motor, son os seus eidos prioritarios. A
axenda de accións da convocatoria de 2019 incluíu misións
comerciais ou alianzas de cooperación para o estudo de mercados:
preto de 200 accións.
