Apple renova os seus portátiles e detalla o lanzamento do seu reloxo de pulso

Esta tarde esperábase que o evento convocado por Apple servise para debullar o lanzamento do seu novo reloxo de pulso, pero a compañía de Cupertino quixo ofrecer moito máis, anunciando outros servizos e produtos novos, para o que comezaron falando do audiovisual: unha vez máis, continúan sen actualizar o seu Apple TV, e en vez de pór ao día este dispositivo multimedia, optan por reducir o seu prezo de 99 a 79 euros, como un xeito de animar aos usuarios que aínda non teñan un a mercalo como un xeito de achegar os trebellos de Apple ao televisor e de abrir o acceso á tenda de contidos de Apple ao salón.

HBO NOW

Pero esta novidade non chegaba soa, senón que era a desculpa para presentar ao público o servizo HBO NOW, que a partires de abril estará dispoñible para Apple TV, iPad, iPhone e iPod Touch nos EE.UU. e permitirá aos usuarios contratar os contidos da canle televisiva HBO para o seu consumo baixo demanda por 14,99 dólares/mes, ou sexa, o mesmo prezo que ten nos paquetes de televisión por cable, pero sen precisar da contratación dos mesmos. Este lanzamento chega coa estrea de novos episodios de Game of Thrones e Silicon Valley, e o primeiro mes do servizo será de balde, o que podería atraer a moitos consumidores a probar esta experiencia audiovisual que busca atacar ao modelo tradicional de televisión de pagamento nos EE.UU.

Compromiso coa investigación médica

Nos últimos meses Apple fixo avances importantes nas súas plataformas de pagamento e saúde, e o progreso de Apple Pay nos EE.UU. resultará agora moito máis visible, pois este sistema de pagamento móbil comezará a funcionar nas máquinas expendedoras de refrescos de Coca-Cola. Pero no sector da saúde non só conseguiron chegar a acordos con máis institucións para facilitar o uso do smartphone como centralizador de datos de saúde, senón que tamén quixeron aproveitar estas posibilidades para a investigación, o que levounos a preparar unha nova plataforma, ResearchKit, que sorprendentemente vai ser de código aberto.
Este proxecto polo momento ten xa 5 aplicacións para axudar a usuarios que padezan asma, Párkinson, diabetes, cancro de peito e problemas cardiovasculares, servindo estas ferramentas para recoller información con grande frecuencia e precisión, facilitando o desenvolvemento de investigacións en base aos datos recompilados. A información tamén terá un retorno directo no usuario, que recibirá consellos para mellorar a súa vida ou poderá identificar a idoneidade dos seus hábitos en función das súas condicións en cada momento.
Canta máis información recollida con maior frecuencia conten os investigadores, máis poderán avanzar os seus estudos, o que repercutirá finalmente en toda a sociedade.

Novos ordenadores portátiles

O catálogo de produtos de Apple continúa a renovarse, e ao MacBook Pro e o MacBook Air súmase agora un novo MacBook con pantalla de 12 polgadas que é toda unha revolución, xuntando numerosas innovacións nun único equipo. Pero este novo lanzamento non fai que Apple esqueza os equipos actuais, e decidiron renovar tanto o MacBook Air coma o MacBook Pro.
Os cambios do MacBook Air dende hoxe mesmo son un tanto discretos, limitándose á incorporación de procesadores Intel Core de quinta xeración, o que supón tamén a modernización da súa gráfica e a incorporación da tecnoloxía Thunderbolt 2, ou sexa, unha simple actualización tecnolóxica natural, que no caso do modelo con pantalla de 13 polgadas afectaría tamén á súa unidade de memoria sólida, que podería chegar até a dobrar a súa velocidade. Estes equipos parten dun prezo de 999 euros (para o modelo de 11 polgadas con 128 GB de almacenamento interno) e chegaría a unha base de 1.349 euros para o modelo de 13 polgadas con 256 GB de capacidade.
No caso do MacBook Pro con pantalla Retina non só habería o debido cambio de procesadores pola tecnoloxía máis actual, senón que tamén se modificaría o seu trackpad para incorporar o modelo deseñado para o MacBook, que inclúe a posibilidade de facer Force Touch, o que muda o xeito de controlar o equipo. Os MacBook Pro con pantalla Retina parten dun prezo de 1.449 euros para o seu modelo con pantalla de 13 polgadas, mentres que os equipos con pantalla de 15 polgadas non recibirían a actualización polo momento.

O reloxo de pulso ultima o seu lanzamento

E tras varios meses de espera, por fin sabemos o que significa que o Apple Watch sairá á venda a primeiros de 2015, detallándose que o reloxo de Apple sairá á venda o 24 de abril en 9 países entre os que non está España. Nestes territorios o reloxo comezará a verse nas tendas o 10 de abril, cando se abrirá o proceso de reservas do agardado accesorio do que xa sabemos os seus prezos, que serían de 349-399 dólares para o Apple Watch Sport, entre 549 e 1.099 dólares para o Apple Watch máis urbano e a partires de 10.000 dólares para o Apple Watch Edition de outro de 18 quilates.