Anuncian as especificacións do HP Slate 500

Tras a compra de Palm (creadores de webOS) por parte de HP, o anunciado tablet da compañía baseado en Windows 7 parecía ver perigar o seu futuro, pero finalmente o HP Slate 500 ve a luz, e na páxina web de HP xa figura xunto coas súas especificacións e prezo, o que non fai máis que pór en dúbida o éxito deste produto, pois estamos a falar dun trebello que opera cun sistema operativo non pensado para tablets, cun procesador Intel Atom Z540 a 1,86 GHz, 2 Gb de memoria RAM, tarxeta gráfica Intel GMA 500, 64 Gb de memoria SSD, pantalla de 8,9 polgadas con 1.024 x 600 píxeles de resolución, menos de 700 gramos de peso, dobre cámara web, Wi-Fi, Bluetooth, lector de tarxetas SD, USB, a posibilidade de conectarse a unha base que conta con 2 portos USB 2.0 adicionais e unha saída HDMI e un prezo de 799 dólares (572,88 euros), o que non deixa de parecer excesivo para o que ten toda a pinta de ser un ordenador ultraportátil con pantalla táctil e sen teclado, non ofrecendo a experiencia de uso propia dun tablet actual.