Android XR introducirá Gemini en lentes e visores de realidade estendida

No marco do Google I/O puidemos coñecer mellor Android XR, a plataforma de Google deseñada para dispositivos de realidade estendida que nace coa intelixencia artificial como eixo central. Trátase da primeira versión de Android creada especificamente na era Gemini, e con ela a compañía quere redefinir como interactuamos coa tecnoloxía, integrándoa de forma natural no noso día a día.

Un asistente que comparte o teu punto de vista

O núcleo da proposta é a integración de Gemini, o asistente que agora pode ver e escoitar dende a túa perspectiva. Equipados con cámara, micrófonos e altofalantes, os dispositivos con Android XR poden ofrecer axuda contextual en tempo real, sen que precises usar as mans ou apartar a atención do mundo que tes diante. A tecnoloxía permite interpretar o contorno, lembrar información relevante e reaccionar ao instante cando comezas a falar co asistente, o que se traduce nunha experiencia máis fluída e intuitiva, tanto en escenarios físicos como virtuais.

Lentes Android XR: privacidade, utilidade e deseño

Durante a demostración, Google amosou un avance das súas lentes con Android XR, que funcionan en coordinación co móbil e incorporan unha pequena pantalla opcional nas propias lentes para ofrecer información de forma discreta. Esta solución permite enviar mensaxes, facer reservas, pedir indicacións ou sacar fotos sen tocar o teléfono, todo iso mentres mantés as mans libres. Un dos momentos máis destacados da presentación foi a tradución en tempo real durante unha conversa, con subtítulos superpostos que permiten comunicarse con persoas doutras linguas sen interrupcións nin interfaces invasivas.
Pero para que esta tecnoloxía se poida incorporar ao día a día, é fundamental que os dispositivos sexan atractivos e cómodos. Consciente disto, Google anunciou colaboracións con marcas recoñecidas como Gentle Monster e Warby Parker para desenvolver lentes que combinen estilo e funcionalidade. Tamén se prevé traballar con outras marcas como Kering Eyewear, de modo que os usuarios dispoñan dunha variedade maior de opcións adaptadas ao seu gusto.

Un ecosistema aberto e en expansión

Ademais do hardware, a empresa está a poñer o foco no desenvolvemento dunha plataforma aberta que permita á industria crear os seus propios dispositivos e experiencias. A alianza con Samsung, que xa traballa no casco de realidade virtual Project Moohan, amplíase agora a este novo ámbito. Ambas compañías están a colaborar na creación dunha base de software e hardware de referencia que facilitará a chegada de novas lentes intelixentes. Os desenvolvedores, pola súa banda, poderán comezar a traballar coas ferramentas de Android XR a finais deste ano.