Ames lanza campaña para fomentar a reciclaxe tecnolóxica e a sustentabilidade

xoves, 1 de xuño do 2023 S. P.

O Concello de Ames, a través da Concellaría de Benestar Social, vén de publicar unha campaña informativa que fomenta os hábitos sustentábeis de consumo tecnolóxico. Baixo o lema Únete ao movemento da reciclaxe tecnolóxica! pretende dar a coñecer o servizo que ofrece o Banco Municipal de Reciclaxe Electrónica de Ames. Trátase dunha oficina creada en maio de 2022 cuxos obxectivos principais son reducir a fenda dixital para colectivos vulnerábeis e minorar o lixo electrónico no municipio. O Banco sitúase no antigo centro de saúde do Milladoiro. Para obter máis información sobre o servizo pódese escribir ao enderezo osla@agasol.gal.
Orixes
O Concello lembra que o Banco de Reciclaxe Electrónica naceu no ano 2022 tras a sinatura dun convenio entre o Concello de Ames e a Asociación de Empresas Galegas de Software Libre (AGASOL). A oficina recolle equipos electrónicos doados por persoas ou institucións que xa non os usan, de xeito que poidan seguir sendo operativos para quen dispoña de menos recursos. En concreto, recóllense computadores portátiles, torres, periféricos (monitor, teclado...) e compoñentes internos (RAM, HDD...). Os equipos son reacondicionados para alongar a súa vida útil e así ofrecer a posibilidade de reutilización aos colectivos en situación de vulnerabilidade. Ata o día de hoxe xa foron moitos os equipos entregados a persoas e colectivos.
Dende a súa creación, organizáronse diversos obradoiros nas súas instalacións, como o de seguridade dixital básica, de reparación e reciclaxe de altofalantes, de instalación de computadores e de robótica.
Agora, a Concellaría de Benestar Social, a través da súa Oficina de Voluntariado, vén de lanzar unha campaña denominada Únete ao movemento da reciclaxe tecnolóxica! para dar a coñecer o servizo entre a veciñanza, e promover tanto a reciclaxe de todos os aparellos electrónicos que non se usen como a solidariedade cos cidadáns con menos recursos que precisen da súa doazón, así como ás organizacións sociais e culturais do Concello de Ames.
A campaña propón a cuestión Sabías que doando todos os aparellos que hai nas casas sen usar a fenda dixital resolveríase?. Así mesmo, convida aos veciños e veciñas do concello e da súa contorna a doar o seu ordenador ao Banco Municipal de Reciclaxe Electrónica de Ames, de forma que se lle dea unha nova vida con software libre, reducindo a piratería.

PUBLICIDADE