Amazon adía o Prime Day por mor da COVID-19

martes, 21 de xullo do 2020 Marcus Fernández

A mediados de xullo é tradicional a celebración do Prime Day, unhas xornadas de rebaixas por parte de Amazon que en volume de negocio que en ocasións supera ao Black Friday e que rivalizaría co 11.11 chinés e, tras rumores de que este ano a crise sanitaria adiaría a cita ao mes de agosto, agora apuntan a que o Prime Day adiaríase até ao mes de outubro, aínda que sería máis prudente dicir que a data non está definida, xa que a celebración podería mudar en cada mercado no que Amazon ten o servizo Prime (como España).
Ao parecer, a India vai celebrar o Prime Day os días 6 e 7 de agosto, ou sexa, que o adiamento ao outono podería limitarse aos territorios máis afectados polo coronavirus, como EE.UU., de xeito que a situación de Reino Unido, Países Baixos, Luxemburgo, Italia, Alemaña, Francia, Bélxica, Austria e España non estaría aínda clara, polo que Europa tanto podería seguir os pasos da India como achegarse ao calendario norteamericano, aínda que este segundo escenario parecería atender máis a motivos de promoción que de loxística (pois en Europa xa hai bastante tempo que os almacéns de Amazon recuperaron a normalidade).

PUBLICIDADE