Aerocamaras forma en pilotaxe de drons en emerxencias a unha ducia de profesionais de toda España
xoves, 28 de marzo do 2019
Unha
ducia de profesionais chegados de diferentes recantos de España
participaron esta semana en Vilamarín, Celanova e Cortegada
(Ourense) nunha
nova edición do Curso Oficial de Piloto de Drons en Emerxencias e
Seguridade da empresa galega Aerocamaras. Segundo informaron os
responsábeis da actividade, que se desenvolveu o martes e o
mércores, “trátase dunha formación pioneira, xa que foi a
primeira destas características en ser recoñecida oficialmente en
España tras ser homologada pola AGASP (Academia Galega de
Seguridade)”. No curso, os participantes fixeron prácticas para
coñecer de primeira man as utilidades e potencialidades dos
vehículos aéreos non tripulados para situacións de risco.
O
primeiro día, os alumnos foron recibidos no Pazo de Vilamarín para,
despois dunha introdución teórica, afrontar a vertente práctica: o
miolo do curso. As primeiras demostracións e prácticas consistiron
no uso de drons para o transporte de material de seguridade e
emerxencias e na entrega de material de rescate a vítimas. Logo,
fixéronse procuras e rescates con aeronaves equipadas con cámaras
térmicas, de gran utilidade para labores como a localización de
persoas perdidas en grandes áreas de terreo.
Na
primeira xornada práctica a actividade desenvólvese no parque
empresarial e no heliporto de Celanova. Como inicio, levouse a cabo
un plan perimetral de seguridade para, posteriormente, realizar o
estudo dunha contorna afectada por un accidente (neste caso un
incendio simulado) con análises térmicas e localización de vítimas
para a súa evacuación. A xornada incluíu un rescate en altura e,
xa pola tarde, unha procura de vítimas nun accidente cun camión que
transportaba mercadorías perigosas.
A
clausura do curso fíxose en Cortegada de Baños, onde se levaron a
cabo rescates acuáticos, demostrándose a gran utilidade dos drons
para estas situacións, xa que son quen de transportar material
salvavidas ás vítimas até a chegada dos servizos de emerxencias.
Durante
o curso Aerocamaras puxo o foco nas posibilidades dos vehículos
aéreos máis avanzados, é o caso do AeroHibrido, desenvolvido pola
propia empresa galega, que conta coa peculiaridade de “ser o
multirrotor con maior autonomía de voo do mundo”, sinalaron os
responsábeis da compañía, salientando, tamén, o seu carácter
híbrido: combina gasolina con electricidade e pode voar até 7 horas
e transportar cargas de até 5 quilos. “O AeroHibrido é unha
ferramenta perfecta para realizar traballos de apoio en situacións
de emerxencias e seguridade, como extinción de incendios,
localización de vítimas en grandes áreas, rescates acuáticos e en
altura; inspeccións técnicas, traballos audiovisuais e traslado de
mercadorías”, explicaron os responsábeis de Aerocamaras.