Advirten da filtración duns 773 millóns de enderezos de correo electrónico

xoves, 17 de xaneiro do 2019 Marcus Fernández

O investigador de seguridade informática Troy Hunt, responsable do servizo web Have I been Pwned (que permite consultar se os nosos datos persoais filtráronse á Rede) deu conta cunha xigantesca filtración de 773 millóns de enderezos de correo electrónico e 21 millóns de contrasinais únicos, que responde ao nome de Collection #1, e que estarían a difundirse a través de MEGA.
A base de datos en cuestión tería un tamaño duns 87 GB, e estaría conformada por información extraída de numerosos ataques informáticos dos últimos anos, podendo comprobar se os nosos datos foron comprometidos no servizo web de Hunt antes mencionado, aínda que o mellor e dar por feito que foi así, mantendo así a precaución habitual para manter seguros os nosos contrasinais: mudalos con frecuencia e non repetilos en distintos servizos. De feito, para facilitar esta operación existen numerosos xestores de contrasinais que gardan a nosa información, poden xerar contrasinais moi complexos de xeito aleatorio e incluso permiten que se cambien con certa frecuencia para que as numerosas filtracións de contrasinais non teñan consecuencias prácticas para a seguridade das nosas múltiples contas de usuario.

PUBLICIDADE