ARTeria Noroeste anuncia novos cursos de tratamento de son, imaxe e vídeo

mércores, 16 de febreiro do 2011 Raquel Noya

ARTeria Noroeste vén de facer público (na Rede social Facebook) o seu programa de formación tecnolóxica para as vindeiras semanas de febreiro e marzo, e nel inclúe cursos de fotografía, son e vídeo para tódalas persoas interesadas en adquirir formación específica neste eido.
Estes cursos darán comezo o vindeiro 21 de febreiro co dedicado ao Podcast, no que as persoas asistentes poderán profundizar os seus coñecementos nesta ferramenta de tratamento de contidos de son para a Rede. Terá lugar do 21 ao 24 de febreiro e nel, o profesor Antonio Giganto, profesional da RNE, mostrará as posibilidades deste programa de comunicación, tales como a gravación, edición ou tratamento de programacións radiofónicas destinadas a ser colgadas en Internet.
Posteriormente, do 5 ao 26 de marzo, en horario de 10:00 a 15:00 horas, terá lugar no mesmo recinto o curso de Edición dixital de vídeo con Avid Media Composer, que impartirá o profesional do sector, David Pardo.
Trátase dunha proposta formativa dirixida a estudantes de cine, comunicación, artes plásticas ou calquera persoa con motivacións na aprendizaxe da linguaxe audiovisual que empregará o sistema de edición dixital máis empregado na industria audiovisual actualmente: o Avid.
Asemade, do 14 ao 22 de marzo, da man do profesor Graham Newey, levarase a cabo un curso sobre Home Studio, unha proposta formativa dirixida ás persoas afeccionadas á gravación de son en xeral, que queiran aprender a sacarlle partido ao seu equipo caseiro.
Este obradoiro permitirá que os alumnos e alumnas desenvolvan un proxecto propio durante a actividade, baixo a orientación do produtor e artista Graham Newey.
Para concluir o programa, ARTeria Noroeste fai unha proposta formativa en fotografía dixital, que inclúe dous cursos: un de iniciación e outro de perfeccionamento, que terán lugar do 9 de marzo ao 1 de xuño os luns e os mércores.
Ámbolos dous serán impartidos por Rafa Pasadas e dependendo dos coñecementos en fotografía das persoas asistentes, este profundizará máis ou menos nos programas de edición Photohop ou Lightroom.
No caso do obradoiro de perfeccionamento, o temario inclúe diferentes modalidades de fotografía creativa profesional, tales como retrato, moda, xornalismo, eventos, deporte... que os alumnos tratarán de descubrir e tratar con programas de edición e maquetación específicos.

PUBLICIDADE