AJE Galicia convoca a VI edición dos seus premios a emprendedores e empresarios
xoves, 10 de novembro do 2011
- AJE Galicia contará co apoio da Cátedra Bancaja un ano máis
Segundo lemos hoxe no DUVI (Diario da Universidade de Vigo), “só o 8 por cento dos universitarios españois considera crear unha empresa como saída laboral, fronte ao 70 por cento que se da nos Estados Unidos”. Son datos moi reveladores que indican cal é situación actual no noso país, onde hai medo a crear un negocio e onde ademais, e para desmoralizarse máis, o 80 por cento das empresas morren nos primeiros 5 anos de vida.
É por iso que, agora máis que nunca, é necesaria a axuda de todas cantas entidades poidan botar unha man para favorecer o emprendemento e asegurar a supervivencia das empresas xa constituídas no noso país, tal e como fai AJE Galicia, que por sexto ano consecutivo, vai convocar os seus galardóns Xoven Emprendedor e Xoven Empresario do Ano.
Segundo indicou Patricia García, a presidenta desta entidade, “con estes premios AJE quere demostrar o valor das boas ideas que se desenvolven na nosa Comunidade e que se convertan en motores de inspiración para a promoción de novos proxectos”, algo polo que traballan dende moito antes desta situación de crise.
A web de AJE Galicia recolle as bases do concurso, que este ano, ademais dos premios a empresas que xa levan dous anos en marcha, contará cunha nova categoría para os proxectos que aínda están en fase de implantación, e con catro accésits: Responsabilidade social empresarial, Calidade, Innovación e Fomento do emprego.
As persoas interesadas en participar poderán presentar as súas iniciativas ata o vindeiro 25 de novembro ás 14:00 horas na sede de AJE Galicia de Vigo, sita na rúa Manuel Núñez, 4.
Os premios, que consisten nunha tarxeta regalo de El Corte Inglés ou ben un máster, entregaranse o 2 de decembro na delegación da Xunta en Vigo.