A revolución do audiovisual na Rede, polo miúdo na segunda edición de Carballo Interplay
martes, 7 de abril do 2015
- Presentación da nova entrega do festival /Imaxe: Tamara de la Fuente
Quen escoitara falar de webseries e queira
ampliar os seus coñecementos sobre a materia, vai poder facelo os
vindeiros días no festival Carballo
InterPlay (CIP), unha cita referencial sobre este fenómeno
tecnolóxico-audiovisual a nivel galego e estatal (pioneira dende as
dúas ópticas xeográficas). O certame, que vai pola súa segunda
entrega, celébrase os días 16, 17 e 18 de abril. As webseries,
para quen ande despistado e non o saiba (malia todo o camiñado xa e
malia o explícito do seu nome, web+serie), son series creadas para
seren distribuídas a través de Internet e inseridas nas novas
correntes e hábitos que contribúen a que a ollada dos seareiros da
TV se dirixa á Rede, e viceversa: que quen ande na Internet sexa
tamén espectador. A
segunda convocatoria de CIP foi presentada os días pasados.
No encontro cos medios, o Concello de Carballo,
organizador do festival, fixo saber que o seu obxectivo é abrir
novos camiños para a cultura, apoiar aos nosos profesionais que
queiran facer cousas novas e, ao mesmo, tempo, afianzar a puxante
cidade galega na rede de localidades que decote se adoitan vencellar
coa creatividade e a vangarda tecnolóxica.
O Concello, xa falando máis en concreto, adiantou
na cita cos medios que este ano hai unha serie de novidades a ter moi
en conta. Por exemplo: que se habilitará unha sección internacional
ben definida e estruturada con webseries chegadas de México,
Arxentina, Francia, Brasil ou Reino Unido, entre outros países.
Ademais, o programa de actividades estenderá o seu radio de alcance
cara aos novos formatos da produción audiovisual, lindeiros coas
webseries e centrados (tamén) en explorar as potencialidades
de Internet “como medio para a narración, o humor, a non ficción,
o patrimonio audiovisual ou as performances
interactivas”. Dito doutro xeito: este ano darase acubillo no
programa a todo tipo de propostas.
Seguindo coa análise da axenda de actividades
previstas, a organización fixo saber que “as mañás do festival
estarán reservadas no Fórum Carballo a diversas actividades
paralelas destinadas a ver desde varios ángulos a industria dos
contidos dixitais e as distintas formas en que Internet nos axuda a
facer humor, a preservar a nosa memoria colectiva ou a rebuscar no
noso código fonte audiovisual”. Polas tardes, o Pazo da Cultura é
o escenario elixido para a proxección das 43 webseries da
sección oficial, escolleitas entre as 144 enviadas ao festival.
Asemade, as tardes serán o intre das estreas: o xoves 16 cun novo
capítulo de Entertainment dos creadores de Malviviendo
e coa película Searching for Meritxell; o venres 17 cunha
batalla audiovisual cos artífices de Venga Monjas e
Malviviendo; e o sábado 18 coa Gala de peche. Segundo engadiu
o Concello, outra das grandes novidades é o Interfight: I
Encontro de labazadas audiovisuais, unha regueifa audiovisual que
manterán Xavi Daura e Esteban Navarro de Venga Monjas,
convidados especiais deste CIP, e David Sáinz e Teresa Segura de
Malviviendo, padriños do CIP. Esta actividade consiste, en
palabras dos seus impulsores, nunha "batalla de vídeos a través
da proxección de pezas audiovisuais sacadas de Internet e mesmo
realizadas polos propios protagonistas co obxectivo de enfrontarse
entre eles poñendo a proba os seus coñecementos e implicando tamén
ao público asistente”.
Outro dos puntos fortes do certame chegará o sábado
18 de abril, coa presentación en público de Proxecto Neme: a
memoria audiovisual de Carballo, unha iniciativa coordinada pola
produtora, profesora e investigadora Beli Martínez na que, xunto con
alumnado e profesorado do IES Parga Pondal de Carballo, traballa pola
recuperación da memoria audiovisual da localidade. A proposta,
inspirada no Proxecto
Socheo da Guarda, exporá os seus achados durante o festival.