A rede 4G de Yoigo chega a Ferrol, Santiago, A Coruña, Pontevedra e Vigo

A tecnoloxía 4 non só está máis preto para os galegos senón que tamén se amplía o abano de opcións. Así, podemos elixir dende as principais cidades os servizos de Vodafone, Telefónica e Orange, pero tamén (a partir de xa) os do operador Yoigo, que anunciou que esta mesma semana comeza a funcionar (antes de que remate o ano) a súa rede 4G nas provincias da Coruña (A Coruña, Ferrol e Santiago) e Pontevedra (para as cidades de Vigo e Pontevedra).
Asemade, antes de que conclúa 2013 estará xa operativa en Áraba, Albacete, Almería, Asturias, Badaxoz, Cáceres, Cádiz, Cidade Real, Guadalaxara, Guipúscoa, Murcia, Toledo e Zaragoza. Asemade, atópase dispoñíbel nas provincias de Madrid, Málaga, Valencia, Barcelona, Alacante, Sevilla, Castelló, Córdoba, Xirona, Huelva, Tarragona e Biscaia.
A rede 4G de Yoigo, que se ofrece aos usuarios sen ningún tipo de custo adicional chega polo tanto a un total de 90 concellos estatais distribuídos en 27 provincias, e está previsto que durante o primeiro trimestre de 2014 a rede 4G de Yoigo cubra máis de 100 cidades das 50 provincias españolas: todas as capitais de provincia e polo menos todas as cidades de máis de 70.000 habitantes. Con este despregamento, a rede 4G de Yoigo terá unha cobertura do 48% do territorio nacional, informan fontes da empresa.
Lembrar que o operador está a despregar a súa rede 4G na banda de 1.800 MHz, a banda que se está a converter no estándar de roaming internacional en 4G, e que permite velocidades de baixada dun máximo de 75 Mbps, cunha media de entre 20 e 40 Mbps. No caso de que Yoigo destine os 15 MHz dos que dispón na frecuencia de 1.800 MHz a 4G, a velocidade máxima de baixada podería chegar a 112 Mbps.