A maior parte da nosa mocidade merca bens e servizos na Rede con regularidade
luns, 27 de xaneiro do 2020
O
observatorio OSIMGA da axencia
AMTEGA presentou estes días un novo estudo que diagnostica a
situación do comercio electrónico na nosa terra, achegando datos de
gran interese sobre o comportamento na Rede por idades e sobre os
hábitos de seguridade que se aplican dependendo da franxa á que
pertenzan os distintos internautas. No informe dise, entre outras
cousas, que os hábitos do ecommerce están especialmente
enraizados na xente nova. En detalle, sinálase que os menores de 35
anos mercan o dobre cós maiores. O informe concreta que case tres de
cada catro galegos de entre 16 e 34 anos adquiren bens ou servizos na
Rede.
Son
datos recollidos no estudo A Mocidade e as TIC. Edición 2019
que vén de publicar o Observatorio da Sociedade da Información e a
Modernización de Galicia (OSIMGA), adscrito á AMTEGA.
O
informe sinala que o 93,7% dos mozos e mozas e 16 a 34 anos navegan
decote pola Rede fronte ao 80,4% dos galegos de 35 a 74 anos. Entre
os indicadores que analiza esta nova edición do estudo cómpre
salientar, tamén, que máis do 97% dos mozos e mozas galegos
empregan as redes sociais, case 27 puntos máis que os maiores de 35
anos.
No
estudo en cuestión plásmase que as actividades realizadas nas redes
sociais difiren segundo as xeracións ás que pertenzan os usuarios.
A mocidade galega supera aos maiores de 35 anos en todos os usos
analizados, destacando o seguimento de contas de influencers
ou marcas comerciais (realizan esta actividade o 46,3% dos mozos e
mozas fronte ao 19,2% dos máis maiores) ou compartir e visualizar
vídeos e música, cunha diferencia de aproximadamente 26 puntos
respecto aos de maior idade.
Fogares
con nenos
O
observatorio volve poñer o foco nas vantaxes de vivir nun mesmo
fogar nativas e nativos dixitais con xente non nacida na era dixital.
O informe sinala a este respecto que a convivencia con nenos en idade
escolar (de 3 a 16 anos) anos aumenta o acceso a tecnoloxía, dende o
uso de dispositivos electrónicos, de Internet ou do comercio
electrónico. “O 99% dos fogares galegos onde conviven nenos e
nenas en idade escolar dispón de acceso a Internet de banda larga”,
explícase, engadíndose que este indicador medra máis de dous
puntos respecto a ano 2017 e supera en máis de 17 puntos porcentuais
á contratación de fogares onde non residen nenos en idade escolar.
Os
menores de 35, máis confiados na Rede
Na
investigación sinálase que un 77% dos galegos da franxa de idade
comprendida entre os 16 e os 34 anos proporcionou información de
contacto ou datos persoais na Rede, 20 puntos máis cós maiores de
35 anos. Pola contra, faise saber que as galegas e galegos máis
novos adoptan máis precaucións que os maiores de 35 anos. E
engádese: “O 58,7% dos galegos máis novos fai regularmente copias
de seguridade da súa información persoal ou garda os contidos na
nube fronte ao 40,9% dos maiores e limita a información que mostra
nas súas redes sociais, como declara facer o 45,1% dos mozos e mozas
fronte ao 49,5 dos maiores de 35 anos”.