A galega Sila Games reforza a súa distribución de xogos dixitais cun servizo de novas personalizado
mércores, 19 de xullo do 2017
Os
responsábeis da plataforma galega Sila
Games, canle de distribución de xogos (principalmente para PC,
Mac e Linux) que inclúe entre
os seus servizos a posibilidade de que os xogadores de calquera
recanto do planeta poidan mercar produtos dende a realidade virtual
(a través da tenda Sila VR
Store), veñen de introducir unha serie de melloras ao abeiro
devandito servizo universal. Sen ir máis lonxe, veñen de crear a
sección con autonomía propia: News.
A nova iniciativa salienta por fornecer aos usuarios dunha resposta
integral, sen atrancos nin límites, aos seus requirimentos de
información actual sobre o ámbito gaming.
En
termos concretos, subministra aos lectores todas as novas do sector,
dende diferentes medios e distintos idiomas, e todo coa vantaxe de
estar dispoñíbel nun sitio único. As novas veñen filtradas e
ordenadas ao gusto do usuario. Sila apostou para esta proposta por
unha interface sinxela e agradábel, moi doada de empregar a través
dunha fórmula de “receitas”.
Por
certo que o lector de noticias de videoxogos chega aproximadamente un
ano despois do lanzamento ao mercado da tenda Sila VR Store, adaptada
ás Gear VR de Samsung.
Para
facernos unha idea do funcionamento de News, os responsábeis de Sila
achegan un exemplo concreto: “Un xogador interesado nos deportes en
liña que quixera datos
específicos sobre os xogos League of Legends
e eSports, podería crear unha receita na que engade
estes dous elementos e elixir de que medios específicos tirar as
noticias, por exemplo IGN e Eurogamer (nas súas versións inglesa e
española), e desta maneira o usuario será quen de ver, unicamente,
as novas dende os dous medios relacionados cos seus intereses
particulares”. E engaden: “O noso obxectivo foi darlle ao usuario
o poder de decidir que información quere ver dunha forma sinxela, de
aí saíu a idea de poder crear as receitas; con esta ferramenta
buscamos que o proceso de ler artigos que sexan do seu interese fose
o máis simple posíbel”.
Para
poder sacar proveito deste servizo os usuarios deberemos crear, en
primeiro lugar, unha conta de balde. Unha vez feito isto xa poderemos
dar forma ás nosas propias receitas e empezar a ler as noticias
filtradas nunha interface que ademais está adaptada para móbiles,
“co fin de poder utilizala en calquera parte”. Polo que respecta
ao proceso de creación de receitas, teremos que elixir o tema sobre
o que queremos ler (entre a manchea de consolas, videoxogos e torneos
dos que se fala nas redes) e logo seleccionar os medios de onde
queremos extraer as informacións, entre máis de medio cento de
canles de todo o mundo dispoñíbeis en seis linguas diferentes. O
terceiro paso é nomear a nova receita para atopala da maneira máis
rápida.
As
receitas creadas serán públicas, de tal maneira que a comunidade
pode subscribirse ás doutros usuarios e así axilizar o proceso de
lectura. Nada mais entrar en páxina (news.silagames.com)
convídasenos a crear unha receita e móstrasenos unha escolma das
máis seguidas, a modo de exemplos.