A galega Scio IT desenvolve unha plataforma que permite as comunicacións no mar en zonas de cobertura nula
mércores, 5 de abril do 2017
A
empresa galega Scio IT, da que temos falado recentemente para
salientar as posibilidades da súa tecnoloxía SAMLA para o
mantemento de infraestruturas inaccesíbeis, vén de aplicar
novamente a súa capacidade de innovación para dar forma a unha
plataforma que permitiría e facilitaría comunicacións dende o mar
e, máis en concreto, dende contornas marítimas onde a cobertura é
nula. Esta tecnoloxía de emisións de sinais será probada estes
días (en fase de probas) por Navantia, con vistas a unha posíbel
instalación na ría de Ferrol. Segundo informa a empresa con sede na
Coruña, a
plataforma chámase Buonet e xa recibiu a licenza internacional
de man do Sistema Internacional de Patentes. Trátase, nas súas
palabras, “da primeira plataforma off-shore de baixo custe
para vixilancia, comunicacións e sistemas TIC”.
Consiste,
máis en detalle, nun dispositivo que, instalado e balizado no mar,
pode ser equipado cun sistema de seguimento mediante cámaras, cun
emisor ou repetidor de comunicacións, así como con calquera medio
para medicións ambientais.
“Desde
este equipamento”, sinala a empresa galega, “pódense emitir e
recibir sinais en zonas de sombra ou onde a cobertura é nula”.
Ademais, engaden, as antenas de comunicacións están condicionadas
pola potencia da estación e a orografía da contorna. Estas
características fan que a tecnoloxía resultante sexa moi acaida
para todas as localizacións, mesmo para emprazamentos costeiros con
accidentes xeográficos moi abruptos, por exemplo cantís, calas ou
rías, onde a cobertura pode chegar a ser literalmente inexistente.
“Buonet é a solución a esta problemática”, informan dende Scio
IT, engadindo que con esta tecnoloxía céibase aos profesionais da
necesidade de instalar soportes específicos e elixir contornas
concretas que demoran a mellora e a evolución das comunicacións
marítimas (en cantís e calas o equipamento de repetidores en terra
é moi custos e pouco eficiente). Pola contra, explican dende a
empresa galega, “o fornecemento de Buonet garante unha total
funcionalidade”.
Lembrar
que Scio xa conta cunha plataforma deste tipo na ría de Arousa que
funciona como repetidor de comunicacións AIS e que permite “en
todo momento e a calquera tipo de embarcación” comunicar a súa
posición e outras informacións relevantes.
Pablo
Bermúdez, director xeral da compañía galega, sinala que é un
modelo “moi rendíbel en comparación cos emprazamentos
terrestres”. Ademais, explica, “unha das peculiaridades de Buonet
é que se trata do primeiro mastro no mar que coas peores condicións
de vento e ondas fica practicamente fixo”. Ademais, é flotante e
ten unha oscilación máxima de cinco graos. O sistema apenas
necesita mantemento e fabrícase integramente en Galicia.