A galega Primux lanza ao mercado os seus novos terminais Alpha e Omega
luns, 4 de febreiro do 2013
A empresa galega Primux,
recentemente de actualidade por ter apostado de cheo pola Tecnópole
de Ourense para emprazar e desenvolver no propio complexo empresarial
o seu centro de I+D (dende o que se lle dan forma e desenvolven os
produtos distribuídos baixo a marca Primux Tech), vén de subir un
novo chanzo en materia de tecnoloxía ao servizo da telefonía. E
faino lanzando ao mercado dous novos terminais de 4,3 e 5 polgadas:
Alpha e Omega, respectivamente. Grazas á súa funcionalidade Dual
Sim, informa a compañía galega, estes terminais resultan
especialmente axeitados para todos aqueles que queiran compaxinar un
alto ritmo laboral cun estilo de vida máis e extra-empresarial, “xa
que permite realizar chamadas con calquera das dúas liñas
telefónicas”.
Estes teléfonos veñen
equipados con Android 4.1, procesador de dobre núcleo, Dual Sim,
Bluetooth, Wi-Fi, cámara traseira de 5.0 megapíxeles e
cámara frontal de 1.3. Soporta micro SD de até 32 Xigabites e
dispón, tamén, de GPS integrado. Asemade, destaca polas prestacións
da súa bateía, que aumenta o seu rendemento no tempo grazas ao
novo procesador que montan ámbolos modelos e que axudan a xestionar
a enerxía do xeito máis eficiente posíbel.
Lembrar que estes e
outros trebellos de primeira liña da vangarda tecnolóxica teñen o
seu xermolo no departamento de I+D en San Cibrao das Viñas, sede da
Tecnópole de Ourense. Dende aí, Primux Tech deseña, fabrica e
vende un amplo abano de produtos de electrónica de consumo: tablets,
smartphones, ebooks, computadores, cargadores, baterías,
teclados, ratos, altofalantes e discos duros externos.