A galega Ayco celebra os seus 15 anos de actividade
luns, 9 de xullo do 2012
A empresa galega Ayco está estes días de
celebración por partida dupla: porque vén de cumprir 15 anos de actividade
e porque unha boa parte dos seus servizos están a día de hoxe, en pleno verán,
fervendo de actividade. E máis se temos en conta que entre as súas achegas
recentes atópanse (por poñer uns exemplos) unha aplicación para atoparmos a
praia galega que mellor lle acae aos nosos gustos ou unha ferramenta,
BDLocaliza, que é o primeiro
sistema de xeolocalización de persoas en tempo real deseñado para o novo Samsung
Galaxy Tab. Volvendo ao aniversario, dicir que Ayco naceu un día como o
pasado 7 de xullo, en 1997, da man de tres compañeiros procedentes de diversas
frontes tecnolóxicas (telecomunicacións, informática) que viron na Internet de
aqueles tempos, unha cousa en desenvolvemento, a canle imprescindíbel da
comunicación futura.
A longo deste tempo, os froitos
da súa aposta foron moitos e de variada natureza (servizos tecnolóxico-dixitais
para o Colexio de Xestores de Pontevedra, para CRTVG, o Concello de Vigo ou a
Zona Franca de Vigo), combinando esforzos
con Vodafone e Blackberry
(co fin de chegar a máis clientes e ofrecer oportunidades novas de negocio) e
colaborando con proxectos europeos de innovación como ATOM, actividade trala que xurdiu Imaxdi, spin off da que falamos hai pouco en Código
Cero para
dar conta da súa participación en CATS Galicia presentando tecnoloxía para os
eidos social e sanitario. Sobre o seu futuro, os tres impulsores de Ayco
adoptan unha postura de optimismo, cousa lóxica e natural tendo en conta o
longo treito percorrido e as pólas que lle foron nacendo, nestes anos, ao
tronco orixinal. “Hoxe en día”,
comentan, “o tronco de Ayco é robusto e
ten fortes raizames, e aínda que medra nun medio hostil, conta cunha serie de
cousas ao seu favor: experiencia, traballado duro, actividade envorcada ao
servizo dos clientes e da mellora dos servizos e aposta firme polo eido 2.0 e
tódolos seus elementos: webs, intranets, aplicacións móbiles, redes sociais,
etc”.