A galega Altia implanta o check-in dixital no Grupo Piñero

venres, 28 de decembro do 2018 Fernando Sarasketa

A empresa galega Altia implantou un sistema para facer realidade o rexistro pola vía tecnolóxica (o chamado check-in dixital) nos establecementos hoteleiros do Grupo Piñero, grupo turístico referente no segmento do Caribe. O obxectivo da implantación do dito servizo é, por unha banda, facilitar ao máximo a experiencia dos viaxeiros nas diferentes dependencias do grupo mallorquín e, pola outra, afondar no coñecemento dos 9 millóns de turistas que elixen anualmente os hoteis da compañía para gozar das súas estadías de lecer.
A iniciativa forma parte da estratexia de transformación dixital da dita corporación, un proceso que ten o obxectivo de “ofrecer aos clientes o mellor servizo posíbel ao tempo que se axilizan e optimizan os procesos internos”.
Para afrontar este reto, Altia e máis o grupo hostaleiro abordaron a implementación dunha arquitectura baseada na integración de tres grandes compoñentes: escáneres SmartCam de Delta para o escaneo de documentación do cliente, tabletas de firma de Wacom para a sinatura do cartón de rexistro de maneira dixital, e integración de ambos sistemas coa central de reservas corporativa de Grupo Piñero.
O sistema irase despregando de maneira graduada nos diferentes hoteis da cadea, alcanzando unha implantación con máis de 325.000 escaneos desde xuño e máis de 40.000 sinaturas realizadas desde agosto coas tabletas. A día de hoxe, o sistema de sinatura dixital estase a extrapolar e implantar noutros procesos da cadea que implican firma por parte dos clientes, como a xestión dos cambios de divisa, restaurante ou gardaría, entre outros. Desta maneira, os establecementos do grupo, Baía Príncipe Hotels & Resorts, xeran un expediente electrónico da reserva a partir do cartón de rexistro, con toda a documentación personalizada e dixitalizada dos clientes. Segundo lembra Altia, “o devandito permite ter toda a información xerada ao longo do ciclo de vida da reserva completamente dixitalizada e dispoñíbel en calquera intre, o que supón beneficios tanto para o cliente, que mellora a súa satisfacción, como para o hotel”.

PUBLICIDADE