A Xunta destina 24 millóns a transformar tecnoloxicamente o noso comercio
venres, 3 de febreiro do 2023
O
director xeral de Comercio e Consumo, Manuel Heredia, compareceu este
venres 3 de febreiro
no Parlamento para informar sobre
as principais medidas de apoio ao comercio de proximidade galego
previstas para este ano, no
que se destinan 24 millóns de euros a contribuír á transformación
dixital e sustentábel
do sector comercial e artesanal;
crear un hub
de innovación para desenvolver novos modelos de negocio e mellorar a
competitividade
do sector; así como impulsar a formación e capacitación para os
profesionais deste ámbito, entre outros aspectos.
Segundo fixo saber, ao longo de
2021 e 2022 apoiáronse máis de 13.660 comercios a través de axudas
para afrontar os retos da dixitalización. En total, dixo, “cunha
achega superior aos 30,3 millóns de euros, posibilitáronse
investimentos e vendas por preto de 70 millóns de euros a través de
medidas consensuadas e postas en marcha da man do sector, para
axustarse mellor ás súas necesidades”.
Entre outras actuacións, Heredia
destacou a axuda do fondo tecnolóxico, única dotada con fondos
europeos Next Generation. O ano pasado lanzouse unha primeira
convocatoria, con 2,7 millóns de euros de orzamento e máis de 367
axudas solicitadas. A segunda convocatoria publicarase nesta
primavera cun importe de 2,9 millóns e o director tamén recordou o
Bono Activa Comercio.
As medidas específicas para este
ano da Dirección Xeral de Comercio e Consumo irán en liña co
diagnóstico realizado a partir de enquisas ás asociacións locais,
estudos do sector e agrupacións sectoriais. Este labor de
acompañamento compleméntase co traballo do Instituto Galego do
Consumo e da Competencia.
No tocante aos artesáns, Heredia
lembrou que se está a traballar xunto co sector na tramitación da
nova lei que impulse a Artesanía de Galicia cara ao futuro como unha
actividade económica sustentable, xeradora de emprego e vencellada
ao territorio.