A Xunta confía en Unisys para xestionar a súa rede de comunicacións de voz e datos
xoves, 8 de xaneiro do 2009
AXunta de Galicia vén de
contratarlle a Unisys, unha compañía
global de servizos e solucións de tecnoloxía, un proxecto de outsourcing de
dous anos (prorrogable durante outros dous adicionais), na Consellaría de
Presidencia, Administracións Públicas e Xustiza para xestionar os seus sistemas
da plataforma informática da Dirección Xeral de Calidade e Avaliación das
Políticas Públicas (DXCAPP) e da rede de comunicacións de voz e datos da Xunta.
Deste xeito, aseguran dende a compañía de servizos, “a institución poderá mellorar a calidade
dos servizos que lle ofrece aos cidadáns galegos e reducir os custes
operativos”.
As infraestructuras que xestiona Unisys inclúen máis de 280
servidores así como unha rede de almacenamento e backup con máis de 40 TB de capacidade. Sobre a plataforma
despregada, instaláronse máis de 250 aplicacións, preto de 450 bases de datos e
máis de 300 webs.
Por outra banda, a rede multiservicio xestionada está
formada por tres aneis co centro situado en Santiago de Compostela. O
equipamento dos nodos está dimensionado para dar acceso a puntos remotos
mediante liñas dedicadas, accesos básicos RDSI, accesos ADSL, ATM,
MetroEthernet e conexións vía satélite.
Dende o Centro de Xestión de Rede da Xunta de Galicia,
Unisys administra todos os equipos de comunicacións que forman parte da mesma,
tanto os nodos troncais como os de acceso, ubicados nos máis de 2.800 centros
remotos.
O director de outsourcing en Unisys
España, Ángel Luis López, vén de anunciar que, dentro da estratexia de
crecemento de Unisys nos servizos de outsourcing no Sector Público, “a Xunta de Galicia é un cliente estratéxico,
non só pola imoportancia do contrato, senón tamén porque reforza a presenza da
compañía en Galicia, dándolle ao mesmo tempo unha referencia de peso no
Sector”.