A Xunta completou en 2012 a implantación de Lexnet en todos os órganos xudiciais da comunidade
luns, 14 de xaneiro do 2013
O pasado ano realizáronse en Galicia un total de 2.551.458
notificacións telemáticas a través da aplicación Lexnet, unha plataforma de
intercambio seguro de información entre os axentes do ámbito xudicial, que
permite as notificacións de xeito telemático, a presentación de escritos e
demandas utilizando a sinatura dixital.
A
aplicación facilita o intercambio da documentación xudicial en soporte
electrónico a través da identificación dixital e a sinatura electrónica dos
profesionais, ademais de reducir os tempos de tramitación e resposta, os
custes, evitando desprazamentos e contribuíndo á eliminación da notificación en
papel.
A
aplicación Lexnet xa está operativa en todos os órganos xudiciais da Comunidade,
tras rematarse a súa implantación na provincia de Ourense este ano. Durante
2012 a provincia da Coruña, a primeira en completar a implantación deste
sistema, rexistrou preto de 1,5 millóns de notificacións telemáticas, seguida
de Pontevedra con máis de 800.000 notificacións, Lugo con 177.000 e Ourense, a
última provincia na que se implantou, con 65.000 notificacións rexistradas
desde o pasado mes de xullo.
Beneficios
A implantación de Lexnet está a permitir unha redución das operacións de envío
de notificacións, escritos ou copias de escritos así como dos desprazamentos.
Ademais, Lexnet garante a máxima fiabilidade na comunicación, ao facilitar aos
usuarios un certificado do momento do envío don selado de data e tempo e ofrece
todas as garantías de seguridade ao tratarse de redes pechadas con control de
acceso e identificación de usuarios.
Funcionamento
O acceso a Lexnet realízase mediante un certificado dixital que permite a
autentificación do usuario. O soporte físico do certificado dixital é unha
tarxeta criptográfica Kronos que está a implantar a Xunta para a acreditación
dixital dos empregados públicos. Ao introducir a tarxeta no PC o empregado
accede a Lexnet identificándose como usuario autorizado do sistema e pode
proceder ao proceso do envío que asinará dixitalmente.
O
sistema Lexnet ten un funcionamento similar ao correo electrónico pero garante
que o emisor da documentación é quen di ser; a confidencialidade e seguridade
do sistema xa que só o receptor da documentación poder acceder á información e
a integridade do contido do documento que non pode ser modificado durante o
proceso.
Formación
O proceso de implantación de Lexnet estivo acompañado de actividades formativas dirixidas ao corpo de funcionarios de xestión procesual, procuradores, avogados do Estado e da Axencia Tributaria. A formación realizouse nos xulgados no propio posto de usuario co obxectivo de que fóra máis funcional e operativa posible.
