A UVigo levará a ciencia e a tecnoloxía a rúas, museos, parques e bares ao abeiro da G-Night
venres, 17 de setembro do 2021
A
Universidade
de Vigo presentou este 16 de setembro o seu programa de actividades
para celebrar a Noite galega das persoas investigadoras, a G-Night,
á que tamén se sumaron (conxuntamente) a Universidade de Santiago e
a Universidade da Coruña (esta última
compartiu o mércores a súa axenda) e que encherá con accións
de divulgación científica e tecnolóxica as cidades de Vigo,
Ourense, Pontevedra, Santiago, A Coruña, Ferrol e Lugo. Segundo fixo
saber a UVigo, será unha conmemoración internacional da ciencia e o
coñecemento na que ciencia e coñecemento estarán máis ca nunca
fóra dos laboratorios.
Este
xoves as vicerreitoras de Comunicación e Relacións Institucionais
da UVigo, Mónica Valderrama, e de Investigación, Belén Rubio,
foron as encargadas de presentar a programación deste evento de
divulgación científica que se celebra de xeito simultáneo en
cidades de toda Europa o último venres de setembro e que, no caso de
Galicia, está coordinado pola Universidade de Vigo. O obxectivo é,
como explicaba Rubio, “achegar a figura da persoa investigadora e a
investigación e os seus beneficios á sociedade en xeral, prestando
especial atención ás vocacións científicas”. Nesta edición, a
décima, e baixo o lema Conciencias Creativas,
“o leitmotiv será a creatividade e a súa relación co coñecemento
científico, a ruptura de estereotipos e a interdisciplinariedade”.
A
Universidade de Vigo coordina este evento en Galicia e conta cun
financiamento de preto de 154.000 euros, procedentes do programa
marco H2020, a través das accións Marie Sklodowska-Curie Actions.
Xunto coa institución viguesa participan na organización das
actividades as universidade de Santiago e A Coruña, o CESGA, a
Unidade de Cultura Científica da Delegación do CSIC en Galicia e
Instituto de Investigacións Mariñas, o Centro Oceanográfico de
Vigo, Gradiant, ITMATI, INIBIC, SEBBM, co patrocinio da Xunta de
Galicia.
A
programación da G-Night en Vigo comezará con actividades en centros
escolares, pero a parte central do evento desenvolverase pola
tarde-noite en diferentes localizacións. No que se refire a Vigo, na
praza do Berbés instalarase unha feira científica que se poderá
visitar de 18 a 21 horas con 12 postos sobre temáticas variadas,
como ciencia mariña, enxeñaría, xenética, termografía ou o
monopraza de UVigo Motorsport. Ademais, no edificio Redeiras, a sede
institucional da UVigo na cidade, instalarase unha exposición sobre
investigación e divulgación científica en galego e ás 19.00 horas
comezará un ciclo de relatorios sobre temas como quecemento global,
lingüística ou minerais. De xeito paralelo, tamén haberá unha
mostra de graffiti en vivo nesa mesma contorna.
Outras
das localizacións da G-Night en Vigo serán o Museo Marco, no que
dende as 17.30 h haberá un Escape Room e charlas e obradoiros
organizados por CEMMA e o Instituto de Investigacións Mariñas, a
proxección do documental A muller Romana en Gallaecia e o
espectáculo Luthieria electrónica e experimental.
Tamén
haberá actividades no campus, concretamente na Biblioteca Central,
onde se desenvolverán obradoiros e exposicións arredor da
observación astronómica, que culminarán coa actuación do grupo
Tinta. Outro dos piares desta iniciativa é a Ciencia no bar,
unha proposta que levará a divulgación científica a diversos
locais de hostalaría, en concreto no caso de Vigo, no Vitruvia Café,
con tres sesións sobre street art, alimentación ou o
dieselgate. Finalmente, a programación complétase con paseos
científicos pola ría que sairán do Porto de Vigo.
No
que atinxe a Ourense, no campus a partir das 18.00 h haberá un paseo
científico centrado no ecosistema Campus da Auga e en El Pueblo Café
Bar dúas sesións de Ciencia no bar. En Pontevedra terán lugar
tamén actividades matinais en centros escolares e, pola tarde,
Ciencia no bar en La Gramola e un paseo científico no Parque
das Palmeiras.
O
programa completo de actividades de cada cidade pode consultarse na
web do proxecto G-Night. Por mor das restricións anti-COVID,
para participar é preciso inscribirse previamente en todos os
eventos agás na feira científica do Berbés e na mostra de
graffiti.