A USC convértese nunha universidade en liña
martes, 17 de marzo do 2020
Malia
que por mor do COVID-19 os nosos campus reducisen á mínima
expresión a actividade presencial, tanto de alumnado como de
docentes, investigadores e persoal administrativo e de mantemento, a
vida continúa nas nosas universidades grazas ás posibilidades de
traballo, formación e mantemento a distancia que brindan as novas
tecnoloxías. Neste senso, a Universidade de Santiago puxo en
práctica medidas TIC para prolongar ao máximo a actividade docente
e formativa, botando
man de recursos previos como o acubillo dixital Minerva, que
proporciona acceso aberto a a coleccións bibliográficas
dixitalizadas e a gran parte da produción investigadora e docente da
Universidade. En total, Minerva pon a disposición da comunidade
20.000 documentos.
No
que se refire ao
labor dos servizos e unidades administrativas da USC, botouse man de
ferramentas corporativas virtuais para permitir o bo desenvolvemento
do traballo non presencial, “de tal xeito que o persoal poida
realizar a súa actividade dende o seus respectivos domicilios”. En
todo caso, a USC determinou que “durante a xornada laboral, cada
persoa deberá estar localizábel e ter activado o correo corporativo
e o teléfono móbil persoal”.
O
obxectivo destas e outras medidas é converter á Universidade de
Santiago, ante a eventualidade do coronavirus, nunha institución
educativa plenamente en liña.
Minerva
Na
actualidade, este fondo online está estruturado nos apartados
Arquivo Histórico Universitario con 363 documentos; Biblioteca, o
cal consta de 3411 recursos; Docencia e Innovación Educativa con
643; I+D+I, dotado de 12753 elementos; e Institucional con 2110. En
total, Minerva reúne na actualidade preto de 20.000 recursos
dixitalizados que contribuirán, en palabras da USC, “a facer máis
sinxela a docencia telemática que acaba de implantarse por mor da
crise do coronavirus”.