A Técnopole presta apoio ás PEME galegas para acadar os mellores resultados en Mobile World Congress
venres, 24 de xaneiro do 2020
Entre
o 24 e o 27 de febreiro vaise celebrar en Barcelona o que para moitos
profesionais TIC é o evento tecnolóxico máis relevante do ámbito
estatal e un dos máis referenciais do ámbito europeo e global: o
Mobile World Congress.
Para acadar que a presenza das nosas empresas sexa o máis ampla e
destacada posíbel, a
Tecnópole de Ourense (Parque Tecnolóxico de Galicia) anunciou que
prestará soporte ás PEME galegas para concertar reunións
bilaterais con outras firmas e entidades no devandito congreso sobre
tecnoloxías móbiles. A Tecnópole materializará este
compromiso coa dinamización da participación galega ao abeiro da
súa condición de membro da rede Galactea Plus, o nodo español da
Enterprise Europe Network.
Ao
fío da relevancia mundial do congreso, o parque ourensán lembra que
no evento barcelonés máis de dous mil empresas e entidades
procedentes de máis de 200 países mostrarán as últimas
innovacións en dispositivos móbiles, “mentres se desenvolve un
amplo programa de relatorios no que se darán a coñecer os retos e
tendencias máis relevantes para o futuro do sector”.
No
seu papel de co-organizador do Brokerage Event que se celebra entre
os días 25 e 27 de febreiro no marco da feira, o Parque Tecnolóxico
de Galicia ten acceso á listaxe de participantes e ofrece soporte ás
PEME galegas para “xestionar a procura de contactos axeitados, así
como para concertar reunións con eles”.
A
Tecnópole lembra que os brokerage events son “unha
ferramenta especialmente interesante para as PEME, xa que lles
permiten acceder a contactos que están decote fóra do seu
alcance”.