A RAGC distingue o labor de 20 grupos das nosas universidades que loitan contra a COVID
venres, 24 de xullo do 2020
A
Real Academia Galega de Ciencias
recoñeceu este mércores, oficialmente, o traballo de 20 grupos de
investigación das tres universidades galegas (9 da USC, 7 da UVigo e
3 da UDC) polas súas importantes contribucións científicas e
tecnolóxicas na loita contra a COVID-19. A concesión das
distincións, que se elaboraron sobre a base de máis de 150
propostas de investigación, celebrouse no salón nobre de Fonseca,
na USC, e contou coa presenza da conselleira de Educación e dos tres
reitores das nosas universidades. En cuestión de áreas de traballo,
estiveron moi presentes (entre outras) a Intelixencia Artificial e a
análise e seguimento de datos a gran escala (Big Data), que
foron
os ámbitos nos que se centraron os investigadores recoñecidos do
CITIC.
Na
cita lembrouse que os proxectos contaron con financiamento de
diversas institucións (como o Instituto de Salud Carlos III, a
Axencia Galega de Innovación (GAIN), o Fondo Supera-COVID, a
Fundación Amancio Ortega, o SERGAS, Tragsa, Augas de Galicia e
EdardeBens), e que foron realizados nas tres universidades galegas.
O
presidente da RAGC, Juan M. Lema Rodicio subliñou que “A ciencia
galega soubo estar á altura das circunstancias, respondendo cun gran
dinamismo e ilusión, fronte a crise e amosando unha extraordinaria
vocación de servizo á sociedade, o que demostra unha vez mais a
necesidade de manter un tecido científico de calidade”.
Os
proxectos encadráronse en seis diferentes áreas. Na primeira, na
que se procura unha detección precoz da infección mediante o
análise das augas residuais, realízanse os proxectos liderados por
Margarita Poza, Claudio Cameselle, Jesús Lopez Romalde e Juan M.
Lema. Avalíase a carga de material xenético do virus nas
depuradoras de augas e nos colectores municipais de un total de 20
cidades e vilas de Galicia.
Mediante
o modelado matemática, nos proxectos de Iván Area, Jorge Mira,
Angel Miramontes e Ricardo Cao preténdese determinar o impacto
futuro da infección baixo diferentes supostos e analizar a súa
distribución xeográfica. “Os modelos resultan de grande interese
á hora de valorar o impacto potencial de diferentes medidas
preventivas que se podan tomar”, informou a RAGC.
Na
terceira área, orientada a novas vacinas, presentáronse os
proxectos dirixidos por María José Alonso, que se dirixen cara a
unha estratexia mellorada para a dosificación da vacina mediante
nanotecnoloxía, e por Javier Montenegro e José M. Martinez Costas
que aplican conceptos orixinais para desenvolver vacinas fronte ó
SARS-Cov2.
O
traballo de Anxo Carracedo, encadrado na área de biomedicina,
pretende encontrar determinantes xenéticos de risco e biomarcadores
xenómicos de resposta e o de David Posada pretende avaliar a
modificación xenética do virus ó longo do tempo. Por outra banda,
Federico Mallo realiza un ensaio clínico para o tratamento da
pneumonía provocada polo virus.
Para
mellorar a eficiencia, precisión e rapidez dos procesos de diagnose
de persoas infectadas pola COVID-19, o traballo de Jorge Pérez Juste
propón metodoloxías innovadoras para novos procedementos de
detección e os de Jacobo Porteiro e Marcos Ortega desenvolven
sistemas baseados en Intelixencia Artificial para axilizar as
análises, clasificar mellor os pacientes, estimando a súa gravidade
e predicindo a súa evolución.
Finalmente
no bloque destinado á desactivación do virus, Juan M.Garrido
explicou o desenvolvemento do procedemento e a produción de 20.000
botellas de hidroxel para o SERGAS, Fermín Navarrina, sobre a
destrución da cápside do virus mediante resonancia e Higinio
González presentou un sistema de desinfección mediante dispersión
de líquidos e sistemas aéreos non tripulados.
Investigadores
do CITIC recoñecidos
Respecto
da temática das novas tecnoloxías, a que centra a actividade deste
medio, veu ligada principalmente aos investigadores do Centro de
Investigación TIC (CITIC) Ricardo Cao, Susana Ladra e Marcos Ortega,
que foron os encargados de recibir un galardón en representación de
grupos de investigación da UDC e proxectos centrados na procura de
solucións directas fronte a COVID-19.
Ricardo
Cao recibiu o galardón en representación do Grupo Modelización,
Optimización e Inferencia Estatística da UDC e pola súa achega en
proxectos relacionados co modelado matemática para determinar o
impacto futuro da infección baixo diferentes supostos e analizar a
súa distribución xeográfica.
Á
súa vez, Susana Ladra recolleu o recoñecemento outorgado ao
proxecto EPICOVIGAL, Epidemoloxía xenómica e
monitorización en tempo real do SARS-C0V2 en Galicia, proxecto
liderado polo investigador da UVigo David Pousada e do que Ladra é
investigadora principal na UDC.
Por
último, Marcos Ortega recolleu o galardón en representación do
Grupo de Investigación de Visión Artificial e Recoñecemento de
Patróns da UDC cuxo equipo investigador desenvolveu diferentes
proxectos destinados a mellorar a eficiencia, a precisión e a
rapidez dos procesos de diagnóstico de persoas infectadas pola
COVID-19 a través da Intelixencia Artificial.