A PlayStation Store europea comezará a vender xogos de PSX esta semana

martes, 19 de xuño do 2007 Marcus Fernández

Os afeccionados á primeira consola PlayStation poderán rememorar os seus títulos favoritos a partires do vindeiro venres, posto que a PlayStation Store europea incorporará os xogos de PSX á súa oferta de descargas comezando con Crash Bandicoot, MediEvil, Wipeout, Jumping Flash e Syphon Filter.
Estas descargas se poderán xogar tanto na consola doméstica PlayStation 3 como na portátil PSP (cun firmware superior ó 3.0). No caso da PS3 os xogos incluso se executarán á perfección en alta definición, o que supón un digno rexurdir destes títulos que tanto agradecerán os nostálxicos.
Estes títulos xa hai tempo que están dispoñibles nas tendas virtuais norteamericanas e xaponesas de PlayStation, pero a versión europea demorouse porque a PS3 é distinta no noso continente, e precisa emular o funcionamento da PSX mediante software (mentres que as PS3 niponas e americanas o fan por hardware).

PUBLICIDADE