A Ourense ICC Week achegará na primavera un destacado menú de música, deseño e innovación
xoves, 27 de febreiro do 2020
Este
ano a semana de actividades creativas e tecnolóxicas da provincia de
Ourense, a ICC Week,
promete superarse a si mesma e gran parte dos eventos máis ou menos
análogos de cantos se celebran a nivel estatal. Así o constatan os
detalles que se saben do programa de eventos, xuntanzas, concertos,
charlas e obradoiros previstos, moitos deles xirando arredor da
innovación e as facianas máis creativas da tecnoloxía (e máis
tecnolóxicas da creación). Este
26 de febreiro o presidente da Deputación de Ourense, Manuel Baltar,
e os coordinadores da semana, Juan Rivas e Manuel Araújo,
presentaron algúns dos pratos fortes da ICC Week.
Por
exemplo a presenza da irmá de John Lennon, Julia Baird, e de The
Quarrymen, a banda que formou o ex Beatle antes de crear o grupo que
lle deu sona mundial, que serán os protagonistas, xunto coa historia
e as anécdotas máis persoais vividas pola banda de Liverpool, da
xornada do 2 de abril, ao abeiro da ICC Week.
O
programa desta edición contará tamén coa participación dos
creativos Óscar Mariné e Toni Segarra, que achegarán a súa visión
do mundo do deseño gráfico e a publicidade, e as novas formas de
expresión artística.
A
plataforma perfecta
Baltar
salientou que a Ourense ICC Week “é a plataforma perfecta” para
seguir ofrecendo innovación musical, deportes en liña (eSports)
e xanelas directas ás novas tendencias en calquera xénero de
creación. “Sen dúbida, do 31 de marzo ao 5 de abril hai que estar
en Ourense e vivir esta experiencia de creatividade, e facelo da man
do Goberno provincial, que segue crendo que esta é unha aposta
fundamental, tendo en conta o gran retorno mediático da capital e do
territorio provincial por todo o que significa este evento”,
remarcou o presidente Baltar.
Raíces
dos Beatles
Julia
Baird presentará en Ourense o seu libro Imagine this, no que
relata as súas vivencias co seu irmán, e tamén momentos
posteriores á súa nenez cando John Lennon era xa unha estrela da
música. Esta homenaxe terá unha continuación musical, na mesma
xornada do xoves 2 de abril, protagonizada por The Quarrymen, a banda
orixe de The Beatles. Neste grupo comezaron a súas andainas musicais
Lennon e logo McCartney, en 1957. A banda inglesa, cos membros
fundadores de The Beatles, reunidos de novo en 1997 (Rod Davis, Colin
Hanton, Len Garry e Chas Newby), ofrecerán un concerto que se
converterá en toda unha homenaxe aos inicios do grupo británico.
Máis
concertos de primeira liña
A
vertente musical tamén contará coa presenza de Anni B. Sweet. a
brasileira LA BAQ, Juan Perro, o Festival de culturas africanas
Harmatán, e Bantastic Fand, así como tamén destaca Cadena 100, que
se suma á Semana das industrias Culturais de Ourense cun concerto do
Club 100, que traerá ata Ourense o mércores 3 de abril ao grupo
murciano Maldita Nerea, liderado por Jorge Ruiz. Este concerto, en
colaboración con Cadena 100, celebrarase no Centro Cultural Marcos
Varcárcel.
Anni
B. Sweet en Ribadavia
Esta
nova edición da Ourense ICC Week levará novamente iniciativas
culturais e musicais pola provincia. Así, Anni B. Sweet chegará a
Ribadavia (praza maior ás 12 do mediodía o día 4 de abril) para
presentar o seu cuarto disco, o primeiro en castelán da súa
carreira, Universo por estrenar, editado en 2019. Na cita
tamén estarán Yawners e Isaac Pedrouzo, completando o cartel.
LA
BAQ
Outra
das propostas musicais para esta edición é a artista brasileira LA
BAQ, quen despuntou desde hai uns anos como unha das voces máis
singulares da música alternativa latinoamericana. A cita con LA BAQ
será o 2 de abril no Café & Pop Torgal. Dentro das novidades
presentadas tamén se destacou o concerto da Bantastic Fand, que se
celebrará na xornada inaugural no Café Cultural Auriense. A banda
chega desde Cartaxena co seu rock americano e cancións de onte e de
hoxe.
Deseño
e publicidade
O
deseño e a publicidade terán tamén unha importante presenza nesta
edición, con dous dos máis importantes nomes destes eidos,
recoñecidos internacionalmente: Óscar Mariné e Toni Segarra, o
único español na lista dos 100 Creative Minds da revista Shots e
para moitos compañeiros de profesión e expertos do sector o mellor
creativo español do século XX. No ano 2009 recompilou no seu único
libro as súas reflexións sobre o oficio de publicista. O mércores
1 de abril, no Teatro Principal aportará a súa visión da
publicidade e da creatividade.
Pola
súa banda, no caso de Óscar Mariné, marcas como Camper, Swatch,
Loewe, ou Vega Sicilia son xa referencias míticas do deseño made
in Spain e todas levan a súa sinatura. Este deseñador,
ilustrador, tipógrafo e artista, Premio Nacional de Deseño en 2010,
vén de realizar numerosos traballos nacionais e internacionais en
ámbitos como o deseño editorial, a imaxe corporativa, o cinema ou a
industria musical. O xoves 2 de abril, nunha xornada especialmente
dedicada aos estudantes e profesionais do deseño, -pero tamén
aberta ao público xeral-, no IES Antonio Failde, Mariné fará un
repaso polo seus deseños e por unha traxectoria repleta de
referencias icónicas.
Entre
o 31 de marzo e o 5 de abril
A
sexta edición da Ourense ICC Week celebrarase entre os días 31 de
marzo e 5 de abril, datas que suporán un novo punto de encontro para
expertos, emprendedores e profesionais da creatividade, en diferentes
puntos da provincia para debater, analizar e gozar coas diferentes
propostas culturais e de lecer. Segundo informou a Deputación de
Ourense, “esta nova cita vén ademais avalada polo éxito das
edicións anteriores, reflectido tanto no interese que espertou entre
o público, con presenza moi numerosa nas actividades programadas,
como logrando un alto valor comunicativo e un impacto mediático
substancial”. En edicións anteriores, pasaron por Ourense
personalidades tan relevantes como Javier Mariscal, Gracia Querejeta,
Iker Jiménez ou Ágatha Ruiz de la Prada, entre outros.