A Nintendo 3DS estrea demos descargables

mércores, 18 de xaneiro do 2012 Marcus Fernández

Resident Evil: Revelations é o primeiro xogo en contar con demo para as Nintendo 3DS europeas

Este xoves a tenda dixital Nintendo eShop estreará as primeiras demos descargables para a Nintendo 3DS que corresponderán aos xogos Resident Evil: Revelations e Cooking Mama 4.
Resident Evil: Revelations chegará ás tendas o vindeiro 27 de xaneiro, e está considerado coma un dos títulos que mellor aproveita as prestacións da 3DS á vez que é o título elixido para a distribución inicial do Botón Deslizante Pro (Circle Pad Pro), un accesorio que engadirá un 2º mando analóxico á nova portátil de Nintendo. O xogo tamén destaca fronte ás últimas entregas da saga Resident Evil por facer un leve aceno ao pasado recuperando moitos dos elementos de survival horror que caracterizaban á saga nos seus primeiros tempos.
Cooking Mama 4 será un xogo menos sorprendente, moi na liña das anteriores entregas, que permitirá decorar a cociña, personalizar os utensilios e mesmo inclinar a Nintendo 3DS para cociñar, por primeira vez, dun xeito diferente.
Dende Nintendo tamén adiantan que a eShop actualizarase periodicamente con novas demos para poder probar os xogos antes do seu lanzamento, confirmándose que recibirán este tratamento Metal Gear Solid: Snake Eater 3D, Mario & Sonic en los Juegos Olímpicos – London 2012 e Rhythm Thief y el misterio del emperador.

PUBLICIDADE