A Factoría Eurodixital adapta a súa experiencia en viaxes virtuais ao territorio estatal
venres, 25 de xaneiro do 2013
A
iniciativa galega Factoría Eurodixital, logo de introducir na Rede
as viaxes a Santiago
ou Manzaneda
co valor engadido de poder facelas sen movernos de diante do noso
computador, quere estender a fórmula ás principais xoias
patrimoniais, turísticas e naturais do Estado español. E está a
facelo a través dun novo servizo, spainsecret.com,
unha ferramenta coa que a empresa galega quere “contribuír
a promover España no mundo” ao tempo
que se achega unha oportunidade de autoemprego a disposición de
“quen queira integrarse neste
desafío”. A nova proposta, amais
dunha aplicación a un pais enteiro (España) da experiencia de
visitas virtuais da Factoría en enclaves máis concretos, semella
consistir en si mesma nunha estratexia
anti-crise.
“Vivimos
nuns tempos de embates produtivos”,
sinala a empresa galega, e está claro que hoxe “ninguén
nos vai vir buscar á casa”. Agora
máis que nunca, sinalan os seus responsábeis, “temos
que ser donos do noso destino”. En
base a isto, a Factoría puxo en marcha spainsecret.com, que se basea
como dixemos no modelo de viaxes virtuais en 360 graos (unha das
marcas da casa) que, engaden, constitúe “a
mellor ferramenta posíbel como soporte de negocio e como factor de
xeración de riqueza”. Ao seu xuízo,
as máis de 250.000 visitas en
2011 que atesourou o seu servizo descubregalicia.com amosan a “súa
potencialidade nun mundo cada vez máis pequeno grazas ao uso das
novas tecnoloxías”. A
isto cómpre engadir os recoñecementos obtidos
en 2009 de mans da
Unión Europea, que distinguiu a descubregalicia.com e a
virtualplanet360.com
como exemplos de “boas prácticas no
ámbito da creatividade e a innovación”.
Toda esta experiencia é
a que acumula, precisamente, o novo servizo posto en marcha, que
presenta as múltiples facetas dun destino único á vez que diverso,
en palabras da Factoría. E engade: “Quen entre na nova
web atoparase cunha detallada folla de ruta do lugar elixido;
verá que grazas á súa versatilidade é posible
trasladarse virtualmente a unha cidade e percorrer as súas rúas,
deterse nas súas prazas, explorar os seus edificios, entreterse nas
súas praias ou coñecer a súa oferta de hoteis e restaurantes desde
calquera parte do mundo sen máis axuda que Internet”.
Máis polo miúdo,
explican os membros da Factoría, estamos ante unha ferramenta “cunha
enorme capacidade de penetración” que cingue turismo e novas
tecnoloxías, dous nichos de mercado con “ilimitadas marxes de
crecemento nun escenario global de recesión”. A intención
básica é tirar partido da Internet como elemento que, malia todo,
aínda segue a manter a súa puxanza como escaparate con amplo
potencial produtivo e de proximidade.
A maiores, o que busca a
Factoría, tal e como sinalamos ao comezo, é achegar unha
oportunidade laboral para os emprendedores que queiran acompañar á
empresa galega nesta andaina. O obxectivo é acadar 400 autoempregos
en todo o territorio estatal. Os únicos requisitos precisos para
participaren serán “dispor dunha cámara de fotos, un
computador, conexión a Internet, don de xentes, moitas ganas de
traballar e seguir unhas instrucións de uso que lles capacitarán
para filmar un percorrido virtual 360, así como a formación
necesaria para poder explicalo claramente”. Deste xeito,
engádese, “poderán converterse en embaixadores da cidade ou
localidade no que se asintan, promovendo un valor esencial no mercado
global actual: a visibilidade”. Para
adherírense, cómpre que se poñan en contacto coa Factoría, onde
recibirán, vía correo electrónico, as indicacións precisas para
comezar con este labor.