A Deputación de Ourense, no comité técnico da Rede de Cidades Intelixentes
venres, 4 de outubro do 2019
A
Deputación
de Ourense participou onte en Valencia no Comité técnico da Rede
Española de Cidades Intelixentes, un cumio de innovación e
sustentabilidade destinado a intercambiar achados e sumar forzas para
acadar melloras locais en xestión, comunicación, eAdministración e
transparencia, entre outros moitos parámetros. Na cita estivo
presente o director da Área de Transparencia e Goberno Aberto da
institución provincial, Fernando Suárez, expoñendo Hay un
Ourense para ti. Descúbrelo, unha iniciativa de turismo
intelixente que conta cun orzamento de tres millóns de euros e que
vai ser desenvolvida pola Deputación e máis pola entidade
público-empresarial Red.es.
O
sistema abrangue unha plataforma smart, aplicacións para
móbiles, unha guía con contidos interactivos, cámaras para a
monitoraxe de de rutas e seguimento dos lugares máis visitados.
Entre
outras cousas, Hai un Ourense para ti permitirá aos turistas
que se acheguen á provincia dispoñer dun acceso rápido, sinxelo e
intuitivo de toda a información de interese dos principais recursos
turísticos da provincia (liña Ourense ao teu alcance); de
servizos personalizados baixo demanda (liña Sinte Ourense), e
terán acceso a experiencias inmersivas (liña Ourense guíate).
Suárez
salientou “o protagonismo da Deputación de Ourense”, que
participou neste encontro onde se expuxeron boas prácticas nos eidos
dos destinos turísticos intelixentes, enerxía, medio ambiente,
habitabilidade, infraestruturas, mobilidade urbana e economía, entre
outros.