A Deputación de Lugo apoia a dixitalización de fondos para o arquivo oral do Museo do Pobo Galego
luns, 26 de novembro do 2018
A
Deputación de Lugo quere pór todo da súa parte para apoiar a
cultura galega e, tamén para levar a cultura a todos os recantos
dixitais. Proba diso é o labor de cobertura tecnolóxica que está a
achegar a entidade provincial ao Museo do Pobo Galego, un
labor do que informamos en Código Cero en decembro do ano pasado
e que vén de coller novos azos cun convenio de colaboración asinado
formalmente hoxe. O
acordo foi formalizado polo voceiro do Goberno, Álvaro Santos Ramos,
e o presidente do Museo do Pobo Galego, Justo Beramendi González.
Segundo
fixeron saber, en virtude desta alianza, o Executivo provincial
colaborará con 15.000 euros para os gastos de desenvolvemento
ordinario das actividades do museo en todos os seus servizos, así
como para o proxecto de dixitalización e estudo de fondos para o
Arquivo do Patrimonio Oral da Identidade (APOI). Beramendi explicou
que este arquivo é un fondo documental e dixital sobre música
tradicional galega, festas e celebracións populares, entrevistas e
outros documentos audiovisuais, así como un gran número de datos
etnoculturais, que ten como obxectivo “promover e impulsar o noso
patrimonio inmaterial e cultural”, ao tempo que se poida empregar
como un recurso didáctico.
Santos
Ramos explicou que “colaboramos co Museo do Pobo Galego para facer
posíbel o labor desta entidade e permite a celebración de ducias de
iniciativas coma estas, encamiñadas a preservar e difundir a
identidade común que temos como galegos”. Segundo engadiu, este
compromiso da Deputación xorde do convencemento do equipo de Goberno
sobre “a necesidade de que as administración públicas se
impliquen no estudo e posta en valor dos recursos senlleiros do noso
pobo”.
Santos
e Beramendi fixeron saber que todos os arquivos da base de datos do
APOI son cedidos polos autores que asinan os seus traballos, sendo
publicamente recoñecidos e respectando o seus dereitos. O proceso de
dixitalización e catalogación de todo este material poderá ser
empregado e consultado en http://apoi.museodopobo.gal.