A Deputación da Coruña achega 730.000 euros para implantar a eAdministración nos concellos pequenos
luns, 12 de novembro do 2018
A
Deputación da Coruña deu a coñecer hoxe unha importante partida de
axudas aos concellos para contribuír á súa transformación cara ao
dixital, o participativo, o interactivo, o áxil e o transparente.
Trátase da liña de axudas PEL-Concello Dixital, que se inclúe no
Plan de Emprego Local da Deputación e que segue o ronsel do proxecto
de dixitalización interna que se está a desenvolver na entidade
provincial e dos procesos análogos de transformación tecnolóxica
iniciados nos concellos aos que presta servizo. En
total, a contía para as axudas de PEL-Concello Dixital, dirixidas aos pequenos municipios coruñeses, é de 730.000 euros.
O obxectivo: acadar nos concellos de menos de 20.000 habitantes (un
total de 82) unha Administración Electrónica en todo o sentido do
termo.
Segundo
explicou hoxe o presidente da Deputación, Valentín González, era
unha necesidade do Goberno provincial que representa dar resposta ás
demandas tecnolóxicas dos concellos e contribuír ao cumprimento das
responsabilidades que a Lei de Racionalización e Sustentabilidade
Local (LRSAL) atribúe a esta institución no proceso de impulsar a
transformación da Administración Electrónica a nivel municipal. En
termos máis concretos, búscase “fomentar a innovación e mellora
na calidade dos servizos públicos dos concellos, así como acadar
meirandes transparencia, comodidade e accesibilidade para todas as
persoas e entidades nas súas relacións diarias coa administración”.
Para
a implantación de PEL-Concello Dixital a Deputación publicou unha
licitación, a través do Servizo de Informática e Administración
Electrónica da institución provincial. Esta contratación pública,
sinalou a entidade, ten por finalidade a execución das actividades
de asistencia e capacitación necesarias para a posta en marcha dos
sistemas que permitirán a implantación da Administración Dixital
nos concellos de menos de 20.000 habitantes (tanto os desenvolvidos
pola Deputación como os xestionados pola Xunta de Galicia ou pola
Administración estatal).
Todo
o devandito implica (entre outras cousas) que os concellos coruñeses
con menos recursos poderán contratar a técnicos expertos en
eAdministración electrónica que servirán de nexo entre as novas
tecnoloxías e a cidadanía, para que a transición cara a Sociedade
da Información “sexa homoxénea en todo o territorio provincial”.
O reto, sinalou Valentín González, é implantar “un novo modelo
de goberno baseado nunha administración eficaz, transparente,
sustentábel, innovadora e participativa, mediante o uso das TIC,
mellorando a eficiencia na prestación dos servizos públicos”.
Aqueles
licitadores interesados deberán presentar as súas ofertas antes do
vindeiro 30 de novembro ás 23.59 horas a través da Plataforma de
Contratación do Estado. O prazo de execución da iniciativa será de
doce meses e o orzamento non deberá exceder os 730.150 euros.