A CE destaca a relevancia do proxecto BIRDS, coordinado pola investigadora galega Susana Ladra
mércores, 5 de xuño do 2019
A
Comisión Europea vén de incluír o proxecto BIRDS, coordinado pola
investigadora do Centro de Investigación TIC da UDC (o CITIC) e
directora do Campus Innova da Universidade da Coruña, Susana Ladra,
ao abeiro da sección Success stories da súa páxina web.
Neste apartado saliéntanse e visualízanse perante o mundo os
principais achados e fitos do proxecto galego e máis a relevancia do
traballo que se está a levar a cabo.
Segundo
informa o CITIC, o recoñecemento da Comisión Europea é unha nova
distinción á iniciativa liderada pola investigadora Susana Ladra.
De feito, o pasado mes de outubro recibiu de mans da presidencia
austríaca do Consello da UE o premio Marie Sklowska-Curie Actions
2018 na categoría Briding (carrer) paths, que valoraba as
“habilidades emprendedoras” e as ligazóns intersectoriais dos
proxectos H2020.
O
proxecto BIRDS, polas súas siglas Bioinformatics and Information
Retrieval Data Structures Analysis and Design, está
financiado pola acción Marie Sklodowska-Curie (RISE) de intercambio
de persoal de investigación e innovación pertencente ao programa de
financiamento de I+D da UE Horizonte 2020 (proxecto con referencia
690941).
BIRDS,
segundo lembra o CITIC, xorde da necesidade de mellorar o
procesamento de grandes volumes de datos existentes en diferentes
eidos de aplicación, ámbitos como a bioinformática e a
recuperación de información. A idea é responder con eficacia a un
reto concreto na investigación: o aumento exponencial da cantidade
dispoñíbel de datos coa que se conta. Neste contexto, mellorar a
excelencia científica dos participantes no proxecto no deseño de
estruturas de datos e algoritmos avanzados para os eidos da
bioinformática e a recuperación de información, aproveitando as
sinerxías destas dúas comunidades, é outro dos obxectivos
principais de BIRDS, amais de “reforzar as colaboracións
existentes e crear novas colaboracións entre todos os participantes,
tanto entre os socios europeos como os internacionais coa finalidade
de desenvolver asociacións de investigación a longo prazo”.
No
proxecto, ademais da UDC, participan universidades de Finlandia,
Xapón, Australia, Chile e Portugal.