300 estudantes celebraron en Lugo o Día da Ciencia en galego
venres, 8 de novembro do 2019
Hoxe
celebrouse en Lugo, da man de Igaciencia (Institución Galega da
Ciencia) e co apoio da Consellería de Cultura, o
Día da Ciencia en Galego, na compaña de (entre outros persoeiros da
investigación e das administracións) Luís Liz Marzán, químico
lucense, e Valentín García, secretario xeral de Política
Lingüística. Na cita, que se desenvolveu no Edificio da Xunta,
participaron tamén 300 estudantes de cuarto da ESO e Bacharelato,
informándose das posibilidades que abre a disciplina da
nanotecnoloxía, que foron debulladas polo químico Luís Liz Marzán.
Valentín
García agradeceulle ao conferenciante que fixese un oco na súa
apretada axenda de traballo para fomentar as vocacións científicas
en galego entre o alumnado de Lugo. Despois, dirixíndose ás rapazas
e rapaces convidounos a defender a lingua propia como alicerce
comunicativo de calquera proxecto ou traballo que queiran
desenvolver: “Por haber en Galicia un sistema educativo bilingüe,
recibides clases de materias científicas en galego, castelán e ás
veces tamén en inglés, pero debedes saber que, sexa cal for a
lingua en que se vos imparta unha área, sempre é posible usar
calquera outra para investigar e divulgar os seus contidos e o galego
non é unha excepción”. Por este motivo, o secretario xeral animou
os estudantes a usar o idioma propio de Galicia “para ler, para
pescudar e para experimentar”, ademais de para relacionarse cos
seus iguais no tempo de ocio.
Alumnado
de todo Lugo
Un
total de 300 alumnas e alumnos de 4º da ESO e de bacharelato dos IES
lucenses Ánxel Fole, Xoán Montes, Leiras Pulpeiro e Nosa Señora
dos Ollos Grandes, dos CPI Plurilingüe de Castroverde e Ramón
Piñeiro de Láncara e do Colexio Fingoi abarrotaron o salón de
actos do Edificio Administrativo da Xunta na Cidade das Murallas para
escoitar a conferencia de Luís Liz Marzán A nanotecnoloxía no
Ano Internacional da Táboa periódica.
A
Secretaría Xeral de Política Lingüística apoiou a celebración
desta conferencia organizada por Igaciencia para celebrar o Día da
Ciencia en Galego, entre outras actividades coas que, ao longo do
mes de novembro, busca promover a divulgación científica,
nomeadamente
da man das bibliotecas públicas e dos equipos de dinamización da
lingua galega dos centros educativos.