2Mares acode esta semana a OMExpo (Madrid) para presentar a súa tecnoloxía de posicionamento corporativo

As nosas empresas TIC continúan o seu proceso de espallamento natural en novos mercados: novos escenarios nos que deixar claro que mesmo os supostos escenarios periféricos como o galego poden converterse en eixes centrais de actividade. Algunhas destas empresas, como 2Mares, compaxinan o traballo na Rede coa busca de lugares reais onde máis posibilidade haxa de atopar audiencias para os seus servizos. Sen ir máis lonxe, 2Mares será unha das representantes galegas no salón OMExpo de Madrid, que se celebra entre mañá e pasado mañá (24 e 25 de abril) no recinto Feira de Madrid. Trátase, máis polo miúdo, cun congreso estatal centrado na publicidade dixital e máis no comercio electrónico, dous dos ámbitos nos que é especialmente forte o servizo Intellixente de 2Mares, unha solución tecnolóxica para o posicionamento de marcas e atención ao cliente en redes sociais.
Lembrar que OMExpo Madrid celébrase de xeito simultáneo con outro evento relacionado, EXPO E-commerce España, constituíndo entre as dúas citas “o maior salón en España dedicado á Mercadotecnia e Negocios Dixitais, así como ao Comercio Electrónico”, informa 2Mares. E engade, facendo referencia ao potencial do evento duplo como escaparate: “OMExpo é o evento anual de referencia onde se dan cita as maiores empresas e tendas en liña cos principais provedores de e-commerce da súa categoría: tecnoloxía e-commerce, guías de compra, loxística, mercadotecnia online, relación cliente, transaccións financeiras, aspectos legais e servizos engadidos”.
O servizo Intellixente é, tal e como sinalamos no seu día, un recurso tecnolóxico para escoitar, de verdade e sen filtros nin intermediarios, a voz do noso cliente. A ferramenta ten un combustible de seu: os milleiros de opinións persoais que se verten nestes servizos de participación, en calquera das súas moitas feituras e marcas, das que Intellixente se nutre para avaliar a posición que ten unha empresa entre a sociedade, neste caso a sociedade 2.0, reflexo en boa medida fiel da anterior, aínda que con engadidos. A firma 2Mares destacou con motivo da súa presentación oficial que con este proxecto o que se desexaba era achegar algo verdadeiramente útil para facer doado e accesible o que en moitas ocasións se presenta como caro e complexo: escoitar ao cliente. “Intellixente”, informou no seu día a entidade con sede en Vigo, “é unha solución segura e fiable que en cinco pasos facilita entender ao cliente e usar a súa voz como material de aprendizaxe organizativo para a mellora de procesos; permitindo mellorar de xeito práctico e eficaz a súa escoita activa”.