160 xogos para o iPhone dispoñibles na AppStore

venres, 11 de xullo do 2008 Marcus Fernández

Super Monkey Ball é o xogo estrela do novo iPhone

Os xogos para móbiles son un negocio que cada día cobra máis forza, e permite a supervivencia de pequenos estudos que en ningún caso poderían desenvolver superproducións para consolas como a Xbox 360 ou a PlayStation 3, e un excelente exemplo da importancia deste sector é que no día do lanzamento do iPhone 3G e da estrea da AppStore (tenda de aplicacións para o terminal) xa se poden adquirir 160 xogos para o móbil de Apple (dos que boa parte son de balde), conformando un dos mellores catálogos de xogos para un teléfono móbil (deixando totalmente en ridículo aos 11 xogos que se poden mercar para a plataforma N-Gage de Nokia).

A saga de xogos de Bomberman tamén se adapta ao iPhone

Na AppStore podemos atopar os xogos distribuídos en varias categorías: Acción/Aventura, Cartas/Casino, Familiares/Nenos, Carreiras/Arcade e Puzzle/Estratexia. Temos así que non é unha plataforma na que predominen, polo momento, ningún tipo de títulos, en boa medida polas distintas interfaces que pode empregar (xa que hai xogos para o iPhone que empregan teclados virtuais, outros fan un uso intensivo da pantalla táctil e outros aproveitan os acelerómetros do terminal), pero que nos sorprende polo alto nivel dos primeiros títulos dispoñibles, entre os que podemos destacar a Super Monkey Ball, Bomberman, o Solitario, Bubble Bash ou Moto Racer.

Bubble Bash é o título de Gameloft que replica o formato do popular Puzzle Bubble

Iso si, os xogos de máis calidade teñen prezos un tanto elevados para un móbil, vendéndose a maioría a entre 3,99 e 7,99 euros, prezo que tamén se podería considerar barato se a comparación a facemos con títulos para a PSP ou a Nintendo DS (destacando que boa parte dos títulos para o iPhone superan sobradamente en calidade aos xogos para a portátil de Nintendo). Precisamente mirando á DS podemos comentar que un dos xogos que mellores vendas está a ter é o Brain Challenge (a resposta de Gameloft ao Brain Training), funcionando tamén bastante ben xogos de acción coma o Super Monkey Ball (que practicamente se alzou coma icona dos xogos para o iPhone) ou Cro-Mag Rally (divertido xogo de carreiras), mentres parece que clásicos coma SEGA Columns Deluxe, Bomberman Touch e Bejeweled 2 tamén presentan unha boa saúde.
Queda ver se a longo prazo as vendas dos xogos para o iPhone se manteñen e o móbil de Apple se converte nunha rendible plataforma portátil de xogos.

PUBLICIDADE